نظرة اعمق للمنزل

البشر بالنسبة لي مثل المنازل (او بالكويتي بيوت)، انت ممكن تدخل منزل شخص ما تعرفه ويستقبلك في غرفة الاستقبال (او يمكن دور كامل!)، نفس لما تشوف شخص في اي مكان وتتكلم معاه راح يعطيك الجانب "اللي ابي اعطيك افضل انطباع عني". تخيل معاي انك قاعد تشوف شخصك ما يعرفك ويضّيفك في بيته ويدخلك غرفة الاستقبال وتكون الغرفه "مدَكوِرَه" وشكلها مرتب ونظيف، هل راح تحكم على البيت كله انه جميل؟ يمكن! لأنك لو شفت شخص ثاني راح تقوله بيت فلان مرتب وخوش بيت، مع انك ما شفت باقي البيت حكمت بس على مظهره الخارجي للمنزل والاستقبال فقط! نفس الشي مع البشر، انت تشوف جانب واحد فقط لما تقابلهم ما تشوف باقي الجوانب، مثل البيت تشوف غرفة وحدة ما تشوف باقي الغرف.

ولو ناخذ نظرة لأي منزل، هناك الصالة واللي فيها الشخص ياخذ راحته اكثر شي، بالنسبة للبشر الصالة تمثل انك قاعد تاخذ راحتك مع الشخص اللي معاك وتوريه جانب من شخصيتك ما توريه لباقي الناس، بالصالة تقدر تلبس "بجاما"، تقدر تتمدد بوجود هذا الشخص لكن في الاستقبال لأ، راح تكون اكثر رسمية. هذا الفرق بين الناس اللي تضّيفهم في الاستقبال او في الصالة، نفسه الفرق بين الاشخاص اللي تطيح معاهم الميانه وترتاح لهم وبين الناس اللي تكون اكثر رسمية معاهم وما يعرفونك بشكل عميق.

اضافة للصالة هناك غرفة النوم والحمام والمطبخ والممرات الي تربط ارجاء المنزل، بالقارنه في عالم البشر هناك جوانب متعدده من شخصية الفرد تربطها روابط غير مرئية، تحد بين ظهور شخصيته بكامل شكلها. انت عاد عليك ان تطلق عنانك وتفكر بالاشخاص اللي تعرفهم وتربطهم بتصميم المنزل وشوف هل تعرف تشرحهم وتربطهم ببعض؟

واحده من اهم الغرف في المنزل راح اركز عليها واتكلم عنها شوي اللي هي المخزن، اللي يحتوي على الاغراض الغير مستخدمة واغراض انت بغنى عنها وممكن تحتوي على اشياء انت ما تبي تتذكرها، رميتها بالمخزن على امل نسيانها! نفس الفكرة موجودة عند الانسان في الذاكرة، هناك جزء يحتوي على ذكريات سيئة او ذكريات ما تبي تتذكرها!

يمكن وانت قاعد تقرا هالكلام تقول بينك وبين نفسك "وبعدين؟" "شالفايدة من كل هالكلام؟". اللي ابي اوصل له واوصله لكم ان لما تتعرف على شخص، انت ما قاعد تشوف الصورة كاملة، مثل ما قلت فوق، انت مو قاعد تتمشى بأرجاء المنزل وتكتشف (يمكن تنصدم!) بمحتوى المنزل، ممكن غرفة الاستقبال تكون افضل مافيه البيت ويكون دافع فيها اللي وراه ودونه وباقي البيت كله ولا شي ومو مهتم فيه. ويصير العكس احياناً!

صعب تحكم على اي منزل من غرفه، لكن مرات تصير، لازم تشوفه كله حتى تحكم عليه اذا يعجبك او لأ، اذا يستاهل او لأ، هذا كله وهو بالاخير مجرد منزل، لكن تخيل معاي لما نتكلم عن انسان؟ وانت فقط قاعد تشوف جانب واحد منه، لازم تشوف كل او معظم الجوانب حتى تقدر تعطي كل شخص حقه. اذا المنزل صعب تحكم عليه من غرفة وحده او من المنظر الخارجي فما بالك بالحكم على البشر اللي هم تشكيل اعقد واعمق واوسع من المنزل اللي هو كله كم غرفه على كم طوفه!!