حلم

.نادر ما احلم وان حلمت دايما اطلع باشياء غريبه

حلمي ليله امس ما كان مختلف عن الاشياء الغريبه اللي قبل. كان الوقت ليل وراد البيت في الشارع اللي بين بيان ومبارك الجابر يساري محطه البانزين، كنت سرحان، مشوش، قاعد افكر. ولا اشوف بنت صغيره فيها ٦-٧ سنين تمشي بنص الشارع خايفه تمشي مرة وتركض مرة بين السيايير، والكل ماشي دايس ماله شغل فيها وكأنها غير موجودة، استعجبت محد فيكم شايفها؟؟

وقفت لها وقعدت اسألها ما ترد ساكته، شلتها ركبتها السيارة وكانت متعاونه لكن ساكته، ولا حتى همسه، شسمج؟ ما ترد، وين ساكنه؟ ما ترد، انزين شتسوين اهني بالشارع وين رايحه؟ ما ترد.. فكرت شسوي فيها؟

شفت ام وبنتها توهم صافطين جدام بيتهم، وقفت لهم أسأل: تعرفون هالبنت؟ اخترعوا قالوا لأ؟ ليش تسأل؟ "لقيتها بنص الشارع ومحد معبرها وخفت عليها" هذا كان ردي، دخلوني بيتهم، وقعدت شوي، يالي ريال في البيت يقولي ما عرفت اسمها للحين؟ اقوله لأ ما ترد.. يقولي ساحلها شوي شوي اقوله ماكو فايدة. شوي ولا يكلمها بلهجه قويه وكلمات ثـقيله على مسمع بنت عمرها ٦ سنين! قلت له شوي شوي عليها تراها ياهل؟؟ البنت اهني نطقت وتكلمت، جنها ناطره احد يكلمها بهاللهجه والاسلوب حتى تتكلم. ه 

انا طلعت من بيتنا وابي ارحل، عيشتي مو هي العيشه اللي ابيها، عشت في بيت شديد وامي تبي تمشيني على حلمها واملها فيني وما تفكر فيني من ناحية "شنو حلم هالبنت واملها؟" دايما تبيني امشي على قرارتها دون السؤال عن السبب. انا انصدمت من كلامها، بنت عمرها ٦ سنين تقول هالحجي؟ قلت لها انزين والحين شنو بتسوين؟ تقول ابي امشي واغني واسعد الناس ابي اكون انسانة سعيدة دون تسلط من فوق، اكون راضيه بقرارتي اللي اتخذتها بنفسي حتى لو كانت بسيطة او خاطئه. وكانت تتكلم بثقه ورضى تام. تفاجئت، فكرت، اردها بيتهم ولا لأ، من وين لي  العنوان؟ توني ياي ابي اسألها عن اسمها، اذن الفير وقعدت من النوم على صوت الاذان :) ه

وللحين البنت ضايعه في حلمي وانا ضايع اكثر منها. ه