Ta3aSSa Day!!


اهلييييين

امس كان يوم زبالة لأن يوم ماراح انساه ابددددد اول شي خل اقولكم شصار اليوم اللي قبله، ربعي احتفلوا فيني وبعيد ميلادي ويابوا لي قطوه سياميه هدية متخيلين القطوه وانا بالمطعم قاعد عطوني اياها؟؟؟

بس أخ منها هالقطوه شسوت فيني من باجر! بلوه -بلوه حلوه- وابتلشت فييييييهاااا


المهم رديت البيت من المطعم حدي مستانس فيها وادري بحصل زفة من امي لأن ما تحب قطاوه داخل البيت بس تموت عليهم برا البيت -ولا تسألون ليش-
الحمدلله امي ماقالت شي عنها، وابوي قالي مسؤوليتك هالقطوه. سميتها سوزي مؤقتا على ما القا لها اسم حلو على طول والاقتراحات كانت درابيل وحصووه و ساميا ومحظوظة

المهم اليوم اللي وراه حجزت لها في مستشفى "آي في أتش" يم ميناء عبدالله وانا طالع من الروضة مع بنت خالتي مارشملوه واخواني اثنين اصغر مني، المهم وانا عالدائري الرابع ولا ادعم لي سيكسويييل!!!!!!
لأن الحماااار وقف بنص الشارع ويبي يلف يسار يصعد الجسر وانا وراه بكمل سيده الف تحت الجسر فوق تحت -اثنينا عالحارة اللي عاليمين كلش- المهم دشيت فيه وتناجرت معاه وهذا الحادث رقم ثلاثه خلال اقل من خمس اسابيع -همن لا تسألون شلون- مادري شفيني ويا الحوادث :(

دقيت على صاحبنا اللي كله اصلح عنده السيارة اسمه زاهد ايراني بشرق رحنا له علشان يصلح السيارة بنفس اليوم قالي تخلص الساعه 9 بالليل وطبعاً بدون لاحد من اهلي يدري وبهالوقت دقيت على رفيجي (صديق العائله كلها) يمرنا علشان يودينا المستشفى رحنا المستشفى وقعد معانا شوي بس لأن وراه مشاوير لازم يسويها قلت له توكل وانا ادق على حموود صاحبنا الثالث يمرنا من شاليهم قريب يمنا وياخذنا يردنا بس طبعاً محنا رادين البيت لأن لازم اهيت برا البيت مع مارشملو واخواني للساعه 9 لوووول.. والله بلشتهم هالربع ما قصرتوا والله :P

بالمستشفى واحنا ناطرين دورنا دشت وحدة معاها قطوه وخدامتها وراها معاها قطوه ثانية والريل بعدين دخل معاه قطوه ثالثه اهما بس دشوووا جان اللي عندنا سوزي هسترت!!! وتشمخ ايد بنت خالتي وتفتح حلجها تبي تاكل ويها واهيا تصاارخ، جان اقوم انا يعني حركة شجاعة مني خذيت سوزي من ايدها، ووالله العظيم عضت ايدي عضضضضضض لين اشبعت وايدي تصب دم واللي يشتغلون التموا عليها وخذوها داخل -الصورة اللي تحت توني مصورها اول ما عضتني كانت وارمه-




والصدمة الثالثة في يومي هذا ان لما دخلنا داخل مع الدكتور ولا تطلع القطوه ذكر -مالت على ربعي اللي ما يفرقون بين نثية وذكر- وانا اقول قطوتي فيها شي غرييييييب!! عاد اهني كل الاسامي المقترحه نقعتهم وشربت مايهم لوول
عاد احترت بين اسمين سامي وعنتر وبالاخير نقيت عنتر عاللي سواه بايدي
عاد هناك بالعيادة غسلت ايدي و البطري حطلها كحول ومطهر و قالي لازم تزور مستوصف حق ايدك، عاد خلصنا من المستشفى وشريناله قفص واغراض حقه من محلهم بالمستشفى ومرنا حمود رفيجي الثاني وخذانا مستوصف السالمية التخصصي

هناك نطرنا ساعه على ما الدكتور يصلي العشا في المسيد اللي يم مجمع بلازا -ليش ما صلى بمصلى المستوصف ماااادري- عاد لا تشوفون شكله يرعى غنم يم الحدود واسلوبه وقح قالي لازم تطعيم 7 ابر على مدى 3 اشهر عطوني وحدة امس وبعد 3 ايام وحدة وعقبهم بـ7 ايام وبعدين 15 يوم وبعدين 30 يوم وبعدين 45 يوم وبعدين شهرين والاخيره بتاريخ 24 ابريل.. هذا غير المضاد الحيوي كل 8 ساعات.. تخيلوا كل هذا من عضته والجروح اللي سواها فيني عنتر



خلصنا من المتوصف رحنا يوريكا وبعدين رحنا الرحاب حق اخوي يبي شريط من هناك وطبعا كلهم فيهم مواقف غبيه وسوالف تضحك بس خل اختصر واقولهم شلون انتهى يومنا..

بالاخير مرينا القراج وخلص السيارة بس شكلها مرقع قالي ردها السبت اكملها بس شكلها الحين يمشي الحال عالاقل من بعيد ما يبين ان فيها شي يبيله اصورها احط شكلها لوول

واخيراً الساعه 10 كل واحد رد بيتهم وارتحناااااااا والله يوم تعييييس وما سوت علي سوزي مادري عنتر بس الصراحة حده كيووووت وشيطاااان ومسوي جووو بالبيت.. ميخالف يستاهل كل هذا شوفوا شحلاته


12 Comers:

Anonymous said...

ههههههههه مسكين كسرت خاطري XD
على الاقل عندك قطوحتى لو عضاض ;(

AnGlOpHiL said...

شحلاته مال عض

الذكر يحب اللعب , بس لي بلغ راح يلعوزك ;)

بس هم انت تكسر الخاطر...شوف اذا مصخها لازم تعاقبه , قص شاربه خله يمشي قري لووول

وناسه قطاوه لوول

و حمدلله على السلامه...شكلك متهور :p

5roofa said...

لووووول يختيييييييييي

حبييييييته واااي ياريت اهلي يقتنعون ايب قطو و اسمي خروف لوووول
لمه قلت حق ابوي عطاني نظره الي انتي صاحيه ولا يبيلج علااج

بس امبي يسوق و سلامتك ما تشوف شر يارب امبي القطو يسوي جذي؟

و خطاك السوو على الحادث عين ما صلت على النبي تشوف كل الناس خاطرهم بالقطو و انت بالمطعم

البوست يونس روعه من زمان مو مسولف معانا جذي

salamz dear friend....

"Gay Boy" Weekly (Blogger Ricky) said...

عاد انا امثر واحد بالدنيا يكره القطاوة...ماااااااحبهم

احس القطوة كائن ماله داعي بالحياه

انا اخاف من القطاوة واشمئز منهم، ووايد صارتلي مواقف وانا بأماكن عامة، مواقف محرجة والسبب القطاوة... مادري ليش اخاف منهم

انت شكلك بتنافسني بحوادث السيارات.. ووايد تصير معاي، وطبعا دايما نفس العذر، اني قاعد بالقهوة وطلعت القى السيارة مدعومة، اخوي صادني بس اشوه للحين ابوي يصدقني، سيارتي مرقعة من كثر الحوادث

انا نصيحتي نفس النصيحة اللي عطيتها حق انجلو.. احرق القطوة وريح نفسك :D

وماتشوف شر، وياريت تسميها هولاكو، نسبة الى هولاكو الجبار، لانها قطوة متوحشة

new one said...

الله وناسه انا امووووووووووووت بالقطاوه

بس احنا مو ممنوع نجيب قطاوه

ممنوع اننا نفكر بفكرة تربية القطاوه :(

ما تشوف شر وسلامات من الحادث

Smart-y said...

futrus
عاد هااااادي مع ان اللي سواه فيني مو شوية بس حده أليف مادري ليش عضني!


ِِanglophil
لوول عاد تصدق كله اقول ودي اقص شارب قطو بشوف شكله شلون يصير :P
بس لأ حرام المسكين ما يستاهل لا تشوفه لما يطالعك ودك صج صج تعضه!
ومشكور عالزيارة والكومنت =)


خروفه
انا علشانج كتبت هالبوست، قلت مو بس خروفه تكتب مواقفها حتى انا بكتب :P
وخطاج اللاش والله يسلمج.. اليوم رحت حق الابرة الثانية شكلي غلط بين اليهال اللي ياين يتطعمون وانا داش عرض بينهم لول

ولاااااع قطو واسمه خروف لييش شذنبه!

Smart-y said...

gayboy
انا كل حوادثي قصتها، طلعت من المكان اللي انا فيه ولقيتها مدعومة وطبعاً العكس صحيح كله انا اللي ادش بالأوادم!!

وعجبني اسم هولاكو لوول لأنه صج متوحش! والله يسلمك.. بس حرام عليك تخاف من القطاوه حدهم كيووووت ودك تفقصهم :P
w thanks 3al comment =)


new one
اول شي منورة بلوغي، هذة اول كومينت لج اهني عدل؟
وليش ممنوع حتى تفكرين بتربية قطوه، عاد يشوقون ونظاف ويسوون جو في البيت :(

والشر ما اييج ان شاء الله والله يسلمج. عاد لا تقاطعين :)

Sara said...

لوووووووووول شحلاته إينن امووت بالقطاوة :) يا حلاته دير بالك عليه ووكله عدل .. ترا ياما انعضينا وياما تشمخت لووول عادي عادي راح تتعود :) اهم شي انك تتطعم وتاخذ الأبر بمواعيدها :)

وكل عام وانت بخير وعيد ميلاد سعيد :)

Smart-y said...

sara
وانت بخير وصحة وسلامة.. ولا تحاتين قاعد اوكله عدل مدلعه آخر دلع لوول شريت له العاب والقطعه اللي يشمخ فيها اضافره وحمام والمادة اللي تنحط فيه ومشط وكرات يلعب فيهم وقفص حق اذا بوديه مكان بس ناقص اخذ له بيت صغير حق النوم ولا سله حلوه.. للحين ما لقيت شي حلو

بس المشكلة اضافره شطووولها بس بالمستشفى قالولي ما نقدر نشيلهم لك الحين لازم بالاول تخلص من علاجه وبعدين نقدر نسوي له grooming

ومشكورة عالكومنت :)

Sara said...

اي سمارتيييز انطر عليه لين يطيب وقص اظافر ايده بس ولا ترا راااح إيننكم ويتلف اثاثكم :)

乂♥Not.ViRGo♥乂 said...

وي طلعت موديهاا البيطري وانا اقترحت في البوست الاعلى منه انك توديها هناك :)
يالله دليل ذكائي مو طفاقتي :))

ما تشوف شر لا يصير فيك انفلونزا

هالايام الحيوانات تخرع امراضهم ما تتسماااش :))))))))

Bombay Bombshell said...

Happy Belated Birthday first of all!
Ehehe Im a dog person who loves cats ;p Ebthemetek, ma 7abait-ha ;p ?
LOL @ The name suzie ;p for a male cat.

Awal Shay Happy Birthday Mu'akharan o Kel3am Wenta Ebkhair :)
Im a dog person who loves cats ;p
o Ma3 kel shay sawah lek Suzie 7abaitah mo :P E3teref..Kent tet7ala 3alaih wehwa Y3e'6ek ;p
Dammah Khafeef mo ? ;p